原创梁风海上梦叠
作者：梁风
沪语改写、朗读：顾敏
推荐：丁迪蒙
读过鲁迅小说《孔乙己》个人，侪晓得先生笔下描写个咸亨酒店。早勒勒30多年之前，我就曾经出差去过浙江绍兴，还勒一个秋雨霏霏个夜快点，顺带便光顾了搿爿闻名天下个百年老店。搿趟故地重游，我是带了怀旧个心情，同时也想体验时光变迁、猎奇个心态陪屋里人再重游咸亨酒店个。
从鲁迅纪念馆搭先生个故居百草园出来，沿勒鲁迅路原本僻静、现在已经拓宽并改建个步行街朝东面去，勿出五百米就是咸亨酒店。店面搭我当年看到个一样，基本浪保持了《孔乙己》里向描述个旧式风貌：屋顶是黑颜色个瓦片，屋檐下头横勒海个还是伊块老大个匾，上头写了四个烫金个大字——咸亨酒店。
对牢街面个还是伊个曲尺形个柜台，可能是因为旅游旺季勿旺，柜台口多了一个中年男子扮成孔乙己，穿了打补丁个大襟长衫，戴了绍兴特有个老式鸭嘴毡帽，用绍兴闲话喊：“吃老酒咯，茴香豆嘞！”靠近柜台看，右边还是两间勿算老大个店堂间，巧也是巧个，虽然已经是中浪向了，居然搭我当年来个辰光一样，天浪落了小雨，一记头让我个记忆穿越，回快速个回放。继续朝里走，店堂间里依旧20只中式八仙台子，搭当年一样，有一大半空勒海，除脱几个外地游客，比当年少了眼农民，大多数还是退休个老人，尽管我来之前做了功课——再读了《孔乙己》，但还是呒没看到书浪写个靠柜台里里外外侪立勒吃酒个人，也呒没了当年跑堂个酒倌，现在的客人侪是座下来扫一扫点菜，慢慢叫吃起来了！
我有个更大个发现，店堂里向开了一道门，进去一看大吃一惊，庭院豁然开朗，别有洞天！左边一排玻璃幕墙隔断，里向类似中式快餐操作间兼展示柜台，琳琅满目个绍兴当地土菜搭仔风味小吃，样品、价钿一目了然，随便点、随手拿。庭院当中后排是装修精美个中式包厢，右面一排木质长廊又回转到进门此地个出口，庭院当中竟然有几十桌搭店堂间一样个矮凳台子，原来里向再是现在咸亨酒店个主要经营场所！勿禁让人感慨此咸亨已非彼咸亨，我想鲁迅先生现在再来动笔，还有《孔乙己》里伊能个古朴搭仔逸趣伐？
于是，“涛声依旧”个情愫驱动我退回店堂，再来仔细审视，柜台右边墙浪保留了伊块小黑板，只别过是写了传统经典酒菜个品种价钿，绍兴最出名个当然是黄酒，俗称老酒。当年品种勿算多，其中最叫得响个是“加饭，花雕，女儿红搭古越龙山等，”现在就增加了交关，譬如讲：“会稽山、同里红原浆、孔乙己手酿……”而且一个比一个包装精美，啥个三年、五年、八年醇甚至十年二十年个，估计也就是厂家个促销手段，啊里得有顾客会得去验证呢？至于价钿，自然也就天差地别了！过老酒个小菜最具特色个当然是茴香豆，是用蚕豆加特殊香料茴香制作个绍兴特色休闲食品，有民谣为证：好吃茴香豆，嚼嚼韧纠纠！不过我当年来个辰光品种比较单一，现在么：水煮个，干炒个，牛肉麻辣个，油炸个，奶油个，椒盐个，五花八门了！记得当年个顾客大多数是点论碗吃个散装老酒，一碗也就几角洋钿，现在依旧保留碗酒，不过现在要好几块洋钿一碗来！勿愿意到庭院里向个，是只想用简餐或者真个就是来品酒个，店堂个柜台，可以速点速食过老酒个小菜有：茴香豆，盐水板栗，煮竹笋，酱油豆腐干，五香豆角，熟个长生果老啥，保留了当年留拨我个绝大部分印象。
别过，我搿趟到咸亨酒店更在意个是，期望寻到我记忆中当年故事个痕迹！伊个辰光，我一进店堂间看到一样物什，邪气意外：柜台右下角个告示浪邪气醒目个写勒：本店经营安徽芜湖特产傻子瓜子，欢迎品尝！哦，搿搭也卖我老家有名个傻子瓜子？改革开放只有没几年，搿傻子老乡居然全国有名了！一股莫名个成就感勾起了乡情，我有眼发呆了。营业员看到了，笑了问我：“同志，侬是要吃老酒还是买瓜子？做迭瓜子个人一眼也勿傻，味道炒了老好个！”耐么我再回过神，脱口而出：“侪要，侪要！”于是，要了一碟瓜子，一碟茴香豆搭几块豆腐干，两碗上等个加饭酒，端到座位浪坐下来。我其实勿大会吃酒，当年勒老家个辰光，也从来勿晓得还可以用瓜子过老酒个，直到现在也没听说过，但是勒此地倒是看到好几位，特别让我忘记勿脱个，是邻座有一位年逾古稀个老先生，酒兴正浓，伊头发几乎侪白了，但是留勒海个胡须倒勿白，让伊头浪搭下巴浪形成较大个反差较，伊衣衫整洁，我到现在还清清爽爽个记得，酒过几碗之后，伊面色红润，我特别注意到，伊哪能用瓜子过酒，只看见伊用牙齿勿大活络个咬开瓜子个尖尖头，再用长指甲轻轻剥开瓜子壳，拿出瓜子肉，连了海吃了好几粒，再眯勒眼睛吃一口老酒，搿副腔调真有神仙之趣，其乐无穷！我马上被伊感染了，也津津有味地学了伊个样子搭吃法品酒了！一时头浪只觉着酒香、茴香豆香、豆腐干也香，傻子瓜子更香！总之是，各种香味，沁入心脾，勿知勿觉要醉了！抬头一看，墙壁浪有副对联：“小店名气大，老酒醉人多。”搿个，大概就是我噶西多年再也呒没有过个吃酒乐趣个原因了伐！真是触景生情，勒搿段美好个回忆里向，我再次走到柜台前头，想寻寻傻子瓜子，可惜已经勿看见了！问营业员、服务员，伊拉也侪太年轻，根本勿晓得店里曾经卖过歇。失望之余我还是屏勿牢看了看墙壁浪，伊幅对联依旧挂勒海，我只好感叹，时光变迁，物是人非邪气正常，我既然已变成现在个闰土，又何必只记挂当年个咸亨呢？想到此地，我还是决定带了屋里人，跑进庭院，寻了座位，坐下来点菜。但酒只吃了几口，就再也没了酒兴，我勿晓得，到底是因为傻子没了个关系，还是孔乙己变得模糊了！
作者：梁风
朗读者：顾敏
原标题：《咸亨酒店个记忆搭变迁》
